مواطن بلا وطن

يابنى نصحتك لما صوتى أتنبح .. خليك فى حالك

مواطن بلا وطن — Mon, 29 Oct 2007 12:21:46 +0000

مما لا شك فيه أن مصر ليست الدولة الوحيدة التى يطفح فيها الفساد
حتى يلوث كل شئ جميل.
وربما تعرف مثلى أن امريكا نفسها بكل ما نسمع عما بها
من حريات وعدل لا تخلو من الفساد والجرائم والفقر.
لكنك قد تنهدش حين تعلم أن مصر هى الدولة الوحيدة
التى تكرم الفاسدين وتمنحهم جوائز وهدايا كمان
ففى مصر يهادى الفاسدون بمناصب وزارية وحكومية ونيابية
لكى يزدادوا ظلما وتعسفا ويتمادوا فى قهرهم للعباد
فلم نسمع ذات مرة فى أكثر دول العالم فسادا أو استبدادا أن رجلا تسبب فى قتل حوالى الف شخص
ثم تركته سلطات بلاده المتعسفة يهرب ليعيش ويتنعم بأموال هؤلاء الذين قادهم قدرهم ليركبوا سفينه من سفنه المخروبة فيغرقوا وعندما يستنجد به القبطان يوبخه لأنه أيقظه من نومه
ثم يخلد للنوم والأنتخة وكأن كل شئ تمام كما حدث مع صاحب العبارة المصرية.

ولم نسمع أيضا فى كوريا الشمالية أو حتى الصين الشعبية
أن مسئولا كبيرا هناك أدخل مواد مسرطنة
فتكت بأكباد المواطنين الغلابة ثم كفائته الحكومة
وتركته دون أن تقدمه للمحاكمة والعقاب كما حدث هنا
بل ربما أندهشت مثلى وأنت تقرأ خبر تقديم اولمرت للمحاكمة بتهمة الفساد.
على الرغم بكل ما تقوم به إسرائيل من جرائم ضد الانسانية
الا أنها من الداخل لا ترحم فاسدين حتى لو كان رئيس الوزراء نفسه.
ولا تتعجب حين تعرف أن الشعب المصرى هو الشعب الوحيد أيضا
الذى يتلذذ بتعذيب الحكام له
وينتعش كلما زاد ربوض الفاسدين على أنفاسه
ويفرح كلما أنضرب على قفاه من هذا المسئول أو ذاك اللى مش مسئول
كل هذا يجعلك حائرا تائها وأنت تسأل نفسك
مش الشعب دا اللى بنتكلم عنه هو نفسه الشعب
اللى خرج زمان بكل ما يملك من شوم وعصى ليواجه
خورشيد وجنده فيعزلونه ؟؟؟
وهو من خرج فى ثورة 1919 ضد المحتل الغاصب ووتلقى بصدره رصاصهم..
هو يا جدعان …هو.. هو شعب مصر مش شعب هونولولو
نفس النظرات البؤس
نفس النظرات الحائرة والتشققات على الوجه
والعرق الذى يحمل رائحة الارض
ونفس الفم الذى يطلق الدعاء المستكين على كل ظالم
أمال في ايه ياجدعان ؟؟؟ ماله جراله ايه ؟؟
فلاتجد إجابة شافية.
تظل هكذا حائرا فى تساؤلاتك حتى يخرجك صوتا تعرفه جيدا
" يابنى أدم .. خليك فى حالك .. علشان تاكل عيش"
" صح صح .. خليينى فى حالى .. علشان أعيش "
لكن لو لا قدر الله جاء محتل غاصب أجنبي
فنهب خيرات البلد المنهوبة
وسرق أموال البلد المتعومة وأكل خيارها وبطاطسها المسرطنة
ترى هل سنقول نفس الكلام؟؟؟
ماهو الحال مش هيختلف كتير عن دلوقتى .. ماهو كله إحتلال
هتلاقى برضه ناس بتنافق الاحتلال وهتلاقى ناس بتدوس على الغلابة
وناس بتمص دمك وناس برضه هتقولك خليك فى حالك علشان تعيش
ومادمنا بنخاف من جندى الأمن المركزى ابو شومة
كيف سنواجه جندى الأحتلال أبو بندقية
"ولتجدنهم احرص الناس على حياه ومن الذين اشركوا يود احدهم لو يعمر الف سنه وما هو بمزحزحه من العذاب ان يعمر والله بصير بما يعملون "
صدق الله العظيم

حوار خاص مع مخلوف رسام الكاركتير بجريدة الدستور

مواطن بلا وطن — Thu, 11 Oct 2007 17:21:52 +0000

كثيرين من قراء الدستور يعرفونه
برسوماته الساخرة التى تجعلك
تدمن فن الكاركتير وتتمنى أن تكون ممن يرسمونه
فبخطوطه البسيطة اللى مش معقدة يصنع من الورق
الابيض وسيلة للبسمة التى ندرت فى عصرنا
بروحه المرحة والمتواضعه يجعلك تخجل من نفسك حين تتحدث اليه
أنه مخلوف كما أعتاد أن يوقع تحت رسوماته
أو مخ مخ كما يطلق عليه أصدقائه
و بصراحه واجهتنى مشكلة عندما قررت عمل حوار معاه
دا لانى لم اقابله فى الحياه وانما أقتصرت أحاديثنا على
الانترنت الذى دائما ما يفصل عنه لكننى الحمد لله تغلبت عليها
بمساعدته واعتزر له على تعطيله كثيرا لاجراء هذا الحوار

أستاذ مخلوف
السؤال الاول تقليدى جدا
ممكن تعرفنا بيك أكتر يعنى ( مين هو مخلوف) وإزاى بدأت الكاركتير ومين اللى ساعدك فى خطواتك الاولى ؟؟

مخلوف رسام كاريكاتير مصرى عادى..بدأت الاول الرسم من زمان جدا
قبل مادخل المدرسة وبعدين جه موضوع الكاريكاتير لما كبرت وفهمت شوية اكتر..
اللى لية فضل عليا طبعا هو ابويا وامى مع انهم مكانوش مثقفين لكن كانوا واخدين
بالهم من الموهبة واهتموا بيا اوى..بعدها اتعرفت على فنان تشكيلى عظيم جدا
هو اللى علمنى الرسم الحياة وهو السبب فى كل اللى انا فبة دلوقتى هو الفنان صالح الجمل
يمكن يكون مش مشهور اوى لكن هو فنان قوى ومتمكن
وعوضنى عن عدم دراستى الاكاديمية للفن وبعدين لما ابتديت اشتغل ف الصحافة من حوالى سبع سنين قابلت
رسام كاريكاتير اسمه طه حسين وكان بيعمل جورنان صغير اسمة المعكوكة اشتغلت فية فترة واتعلمت منه
لكن المعلم الحقيقى للكاريكاتير هو الجنرال عمرو سليم فنان كاريكاتير متمكن جدا ومناضل

2_لماذا أخترت فن الكاركتير دونا عن بقية فنون الرسم ؟؟وماهى العوائق التى واجهتك لكى تتقن هذاالفن ؟؟

ف الاول كنت بارسم رسوم عادية زى الفن التشكيلى كده ولكن لقيت نفسى مش متفاعل معاها خالص
والفنان صالح الجمل كنت باتدرب ف المرسم بتاعه وهو اللى حس انى ميال للكاريكاتير
اخترت الكاريكاتير لانه فن متمرد على القواعد الفنية قبل مايكون متمرد على المجتمع
مش عارف بالظيط اذا كان دمى خفيف واللا لأ بس من زمان كنت باحب اسخر من كل حاجه
واولهم شعرى المجعد وشفايفى الكبيرة وحسيت انى لازم اصرخ ف العالم ده
العوائق اللى خلتنى اتقن الفن ..انت يعنى شايف انى اتقنته؟
عموما انا مستنى الخبرة اللى بتيجى مع الوقت لكن اللى مش قادر احققة ابدا انى ارسم ف رسوماتى
الكاريكاتورية بنفس روح الاسكتش او الشخبطة بتاعتى..العائق انى ياترى رسام يجد واللا لأ

3_لم تكن الدستور جريدتك الأولى فأين عملت قبلها ؟؟

الدستور مكانتش التجربة الاولى
حاولت اشتغل ف الصحافة من سبع سنين اهم التجارب لما اشنغلت تلات سنين فى دار نشر لانتاج كتب الاطفال
اتعلمت كتير وهناك رسمت واخرجت كتب كتير مش عارف ازاى قبلوها منى
التجربة او المحطة المهمة برضه هى عملى حوالى سنه فى جريدة العربى الناصرى بمساعدة زميلى وصديقى الفنان عبدالله والفنان سمير عيد الغنى..وهناك فهمت المعارضة
الاستاذ عمرو سليم بقى شاف شغل عبدالله وشغلى ف العربى الناصرى وكان جرنال اضحك للدنيا بيطلع
ورشحنا لية وبعدها بشهر تقريبا رشحنا للدستور وكان معانا الفنانين
وليد طاهر وهانى شمس و عبدالله احمد

4_ هل شعرت بالخوف عندما التحقت بجريدة الدستور
( يعنى زى مانت عارف انهاجريدة معارضة والوقت اللى ظهرت فيه مكنش حد
يقدر يقول لا لان هيكون مصيره وراالشمس )؟؟

مكنتش مستغرب المعارضة لانى زى ماقلت كنت ف العربى الناصرى وهى معارضة
مكنتش خايف بالعكس انا كنت سعيد لانى كان فى طاقة جوايا وجوا كل الرسامين انهم شايفين وضع غلط يحاولوا يغيروه بالرسم
5_ اذا كنت واحدمن العامة ليس لك اى علاقة بالدستور ( هيكون رايك فيها إيه )؟؟
هاكون مستغرب زيهم من الجرأه بتاعة الجورنال وكنت هادفع يصدر رحل اتنين جنية اللى ساعات بيجيبوا عشا
عشان اقرا الجورنان

6_ليه وافقت على العمل فى جريدة قومية ؟؟

انا اتعرض عليا فعلا انى اشتغل فى مجلة قومية وهى مجلة الاهرام الاقتصادى
وافقت لان طبعا دى مؤسسة الاهرام محدش يرفضها عشان اكون صريح
وكمان اللى رشحنى ليها هو الفنان العظيم نبيل تاج.. اللى انا باعمل الغلاف مكانه دلوقتى
مكنتش اقدر ارفضها لكن طول الوقت باكون حريص انى مااغيرش رايى ابدا
مش هاقول انا رسام كاريكاتير معارض او يسارى

لكن مش هى دى الحكومة اللى تمتدح

7_الكوميديان أشد الناس حزنا جملة تقال على فنانى
الكوميديا فهل تنطبق على رسام الكاركتير؟؟

مش عارف
هى تهمة كده لزقت ف البلياتشو والممثل
رسام الكاريكاتير حتى لو مكتئب وظيفتة انه يقدم للناس رسم فية فكرة وضحك
الجنرال عمرو سليم علمنا كده

8_ ماهو أكثر شئ أستفزك ولكنك لم تستطعأن ترسمه وتسخر منه ؟؟

مفيش

9_ ان لم تكن رسام كاركتير فاى الوظائف كنت تتمنى العمل بها ؟؟

صدقنى انا مش باعرف اعمل اى حاجه غير انى ارسم
لكن لو هاشتغل حاجه تانية برضه هاتكون فى نفس السكة
مؤلف مسرحيات او افلام كوميدية مثلا
10_من هو رسام الكاركتير الذى تشاهد روسومه فتبتسم؟؟
وهل تبتسم حين تشاهد رسوماتك انت؟
على فكرة رسام الكاريكاتير صعب يضحك على اى نكتة لانه بيتوقعها بحكم الخبرة يعنى
الفنان العالمى حسن حاكم طبعا او مايشوف اى رسمه لية حتى لو مش كاريكاتير
بابتسم جدا
لما باشوف شغلى يعد ما ينطبع باكتشف كل عيوبه ومبقاش قادر ابص

11_ معظم رسوماتك تنتقد النظام السياسى طيب اشمعنى
انت مركز على دا رغم ان فيه حاجات كتير ممكن ترسم عنها زى الشباب ومشاكلاته مثلا ؟؟

مش عارف بس انا فضلت ارسن كاريكتير بصفحة ضرية شمس حواللا نص سنه
ودى صفحة شبابية
يمكن بارسم سياسة لان بيكون حماسى وانفعالى بيخلينى انسى المشاكل التانية
بحاول من وقت اعمل رسوم خفيفه اجتماعية وباشتغل للاطفال كمان
ف النهاية كلة بيلمس ع السياسة حتى شغل الاطفال

12_ما رأيك فى فريق عمل الدستور
( سؤال وجهه محمد هشام لدعاء العدل فى حواره على جريدة بص وطل )؟؟

انا شخصيا سعيد جدا انى ف الفريق ده لو كانت تقصد مجموعة الرسامين يعنى
احنا معانا او كان معانا الخيرة الضخمة الفنان الجنرال عمرو سليم
والمحلق الجامد الفنان وليد طاهر..والفنان النشيط هانى شمس
ومعانا عبد الله احمد رسام الكوميكس وكان معانا هشام رحمة ابن الفنان مصطفى رحمة اللى كلنا اتعلمنا من رسومة ف مجلة ماجد
وطبعا اللى متطابق اوى مع شغلة الفنان محمد عبدالله وده رفيق السلاح والمشوار بجد
وبعد كده انضم لينا قنديل ودعاء العدل تقريبا الرسامة الانثى الوحيدة فى عالم الكاريكاتور المصرى
شوف كام رسام وكل رسام لة خطوطه الخاصة وطريقة تناوله للموضوعات وقدراته الخاصة
وخبرة كل واحد بتبهت عل التانى
كلنا ينشتغل ف مكتب واحد على فكرة
ومعانا الرسام السئ مخلوف هههههههه

13_ من هو أكتر ممثل كوميدى تحب ان تشاهد اعماله؟؟
شارلى شابلن
عبقرى وعنده طاقة كوميديا
من مصر
نجيب الريحانى وفؤاد المهندس

14_ماهى المشاكل التى تواجه رسام الكاركتير فى مصر؟؟
اعتقد قلة المجلات والجرايد المتخصصة ف الكاريكاتير
واللى موجود سئ
كمان طبعا بعض الخطوط الحمرا اللى موجوده جوانا ةف الجرايد اللى بنشتغل فيها حتى لو مستقلة
عدم استقبال الجمهور لهذا الفن لانهم غير مثقفين بصريا او تشكيليا
لكن برضه الفن الصادق أكيد بيحسوة
15_ ماهى احلامك التى تتمنى تحققها فى المستقبل
نفسى ابقى رسام كاريكاتير هههههههههههه
نفسى فعلا اوصل للناس لقلوب الناس ويستنوا رسمتى كل يوم
نفسى اكون فنان عالمى واعمل اكاديمية لتعلبم الكاريكاتير
16_ كلمة أخيرة تقولها لشباب ولمحبى رسم الكاركتير؟
ارسموا كتير

دلوقتى وبعد الحوار عاوز أنصحكم نصيحة
بسرعة يوم الاربع الجاى اشتروا الدستور واتفرجوا على رسومات مخلوف
وفريق عمل الدستور
صدقنى هتعجبك انا معرفتش احط روسمات من الجريدة لان مالهاش سايت
ولزيارة بلوج مخلوف ادخل هنا
http://www.makhloufblo2.blogspot.com/
وضيف تعليقاتك

وهكذا هيلغوا المجانية

مواطن بلا وطن — Fri, 05 Oct 2007 18:18:11 +0000

صدمنى صديقى عندما أخبرنى أن مصاريف الكلية أصبحت 120 جنيه للإنتظام و450 ج للأنتساب

أى انه زاد عن العام الماضى بنسبة 100% وعن العام الذى سبقه ب 200%

حيث كانت المصاريف العام الماضى 75 ج للانتظام وج 410للانتساب

والعام الذى سبقه

35ج للانتظام و350 ج للانتساب

دا طبعا غير مصاريف الكتب الغير مدعمة( أصل الحمد لله مافيش كتب مدعمة عندنا)

وبعد أن ظنت الأسر المصرية التى لايزيد مرتبها عن 300جنيه شهريا أنها سترحم بدخول إبنها الجامعة من مافيا الدروس الخصوصية

جاءت قرارات زيادة المصاريف لتصدمهم وتحرق دمهم

المشكلة الحقيقة تكمن فى سؤالين

السؤال الأول أين تذهب هذه الاموال؟؟

فبحسبة صغنونة ستعرف أن كل كلية يدخل لها حوالى 2.5 مليون جنيه من المصاريف التى يدفعها الطلاب

وفى المقابل مستوى التعليم كما هو زى الزفت

ومعامل الحاسب الألى قديمه والأجهزة إشتكت

ولا تندهش حين أخبرك أن فى جامعتى مازلنا نستخدم أجهزة البنتيام 2 والبنتيام 3 وووندز 95

أما عن الأنشطة الطلابية فنحن لا نعرف عنها شئ

بل ستسمع كثير من أمين الاتحاد أنه لا توجد ميزانية لشراء قلم رصاص

اه والله حصلت

ففى العام الماضى عندما ذهب أمينه الاسر وعضو الأتحاد لطلب 2.5 جنيه من المشرف لشراء علبة ألوان

لإتمام لوحة حائط

رد عليهم بالحرف(( مافيش فلوس هاتوا من معاكم ))

وبخصوص الوحدة العلاجية والتأمين الصحى فجميعكم تعرفون المهازل التى تحدث هناك

هذا وفى المقابل لم تزدمنح المتفوقين التى تمن علينا بها الكلية عن 80جنيه للطالب المتفوق

منذ عام 1986

بعض الخبثاء قالوا أن هذه سياسة لخصخصة التعليم

يعنى بعد عشرة خمستاشر سنه

مش هتلاقى جامعات حكومية

يعنى مش كفاية مافيش تعليم كويس

وإحنا راضيين وساكتين

لا كمان عاوزين يحرمونا من التعليم تماما

ولا عزاء الا للسادة المطحونين والمعذبين فى مصر

ولا بكاء الا على ما أنجزته ثورة يوليو

مسلسلات made in china

مواطن بلا وطن — Thu, 04 Oct 2007 13:06:27 +0000

" سيناريوهات محروقة .. مصداقية مافيش.. ممثلين مافيش.. قضايا مهمة مافيش برضه
..تحس أنهم بيمثلوا عليك مش ليك"
لأجل هذه الأسباب أعلنت حملة مقاطعة المسلسلات الرمضانية واللى مش رمضانية كمان
تلك المسلسلات التى أصبح الفارق بينها وبين مسلسلات زمان
هو نفس الفارق بين made in egyptأيام الستينيات وmade in china
أيام دلوقتى.
فجميع هذه المسلسلات عندما تشاهدها تشعر انها بتتكلم عن ناس تانيه وبلد تانيه غير مصر,
فالمستشفيات التى يصدف ويدخلها البطل
( جميلة وعلى مستوى ورعاية مية مية والدكاترة مش هقولك على الاهتمام).
والمدارس التى تصدف وتعمل فيها البطلة
( اوعى وشك مافيش أحسن من كدا ..لا كثافة فى الفصل.. والمدرس بيشرح فى الحصة وكله تمام)

هذا بالاضافة الى تلك البطلة التى جاوزت الخمسين من عمرها ,
ومازلت تصر أن تقدم دور البنت العذراء التى تبحث عن فارس أحلامها لتمثل معه
قصة زهقنا منها تنتهى زى ما كلنا عارفين بالزواج بعد شوية أكشن عربى محروق كلنا فاقسينه.
ومازلت أذكر عندما زرت القاهرة لأول مرة كم كانت دهشتى لأنى كنت
أظن أن كل بنات القاهرة مش محجبين( زى ما بشوف فى المسلسلات المصرية)
لكننى سريعا ما أدركت أد ايه أنا كنت مغفل وأنضحك عليا وأن معظم بنات القاهرة محجبات .
وأن هذه المسلسلات بعيدة كل البعد عنا ولا تعبر مثقال ذرة عن الناس اللى زينا .

أما إذا تحدثنا عن مسلسلات زمان فمازال عدد كبير من هذه المسلسلات
يحتل ذاكرتنا الضعيفة من كثرة المسلسلات
المعادة والمكررة فمن منا لا يذكر ( أبنائى الاعزاء شكرا .. ورحلة السيد أبو العلا..
وليالى الحلمية ..والشهد والدموع)
وغيرها من المسلسلات
التى تشعر وأنت تراها بروعة الاداء وجمال القصة
فالفنانين ملتزمين تحس أنهم فنانين بجد..وكل واحد عارف دوره
لا دا بيفرض على المؤلف حاجة ولا دا بيفرض على المخرج حاجة
أما دلوقتى فتحس اصلا أن الممثل أو الممثلة القصة معمولة تفصيل ليهم مخصوص
ولو مش عاجبهم مشهد بيتغير فى ثوانى ( ورص رص ياعم الحاج هو حد فاهم حاجة)
أما أكثر المسلسلات سخافة واستخفافا بعقولنا وأضطرت رغما عن عين أهلى اشاهدها
زى ما الكل المصريين شاهدوها
فهى مسلسل " التعديلات الدستورية .. بطولة الحزب الوطنى الديمقراطى ""

الاعلام واللى بيشتغلوه

مواطن بلا وطن — Thu, 27 Sep 2007 14:03:41 +0000

كلما فتحت التليفزيون كان هذا الإعلان يطاردنى فى كل القنوات المحلية

" مصر بتتقدم بينا "

"شوفوا بنينا كام مدرسة وكام مستشفى وكام مصنع".

وكأن مشكلة مصر كلها تكمن فى عدد المدارس والمستفشيات !!

وقتها أشعر بأنى أشاهد إعلانا عن مصر تانية غير التى نعرفها

وكأن مصر التى نحياها بمافيها من فساد وروتين مجرد كابوس وحش   بعد اكلة دسمة مش عارفين نصحى منه.

أظل أتابع الاعلان وأنا أضغط على أسنانى ثم أطلق لفظا جارحا

وأصرخ كأنى أتحدث الى شخص امامى

"بتتقدم بينا إزاى ولسه الناس مش لاقية تاكل .. والتعليم كل سوم بيرجع لورا وبيحطم فى أحلام الشباب

بيتتقدم إزاى والمستشفيات زى الزفت ..

وأنت تتخرج من كلية الهندسة علشان تبيع جرايد على كوبرى الجامعة ..لو انت مش مصدقين إن مصر مش بتتقدم ولا حاجة أنزلوا شبرا والقرى والصعيد وأنتم تعرفوا

" انتم ليه بتزيفوا الحقائق انتم بتضحكوا علينا ولا على مين ؟؟"

وبإنتهاء كلامى  ينتهى الأعلان

فأجلس وأنا شارد والاحباط يغشزونى

واتسأل

" هى الناس دى بتستعبط؟؟؟

ايه فايدة الفين مدرسة والنظام التعليم فى مصر فاشل والمناهج لم تتغير منذ 20 عام الا بالحذف لا بالتجديد

يعنى اللى بردسه انا هو هو اللى بيدرسه ابن خالى اللى لسه فى سنه خمسة ابتدائى

هو نفسه اللى درسته بنت عمتى اللى عندها 30 سنة

ايه فائدة أن نبنى الف مستشفى

والمواطن المرسض لا يملك حق الدواء؟؟؟!!!

أو نتباهى ببناء الف مصنع

والعامل يخرج من بيتهم الساعة 5 الفجر علشان يوصل المصنع الساعة 7 الصبح

ويظل يعمل عمله الشاق حتى السابعة مساء

ثم يعود لينام علشان يصحى علشان الشغل وهكذا يظل كالتور فى الساقية

ثم فى أخر الأمر يقبض 300 جنيه لا يكفوه مصاريف الملبس أو المأكل او أيجار الشقة او العلاج؟!!!

والأسم عايش والسلام

اذا كانت مصر بتتقدم بينا فأكيد مش هى مصر بتاعت عمى محمد البقال ولا عمى سعد الفراش ولا عمى أنور الموظف الغلبان

أكيد مصر بتاعت توتو بيه ولولو باشا وشيرى هانم

لأن ان كانت مصرنا بتتقدم بينا فأكيد بتتقدم بينا لورا

بيع بنات مصر ..على عينك ياتاجر

مواطن بلا وطن — Thu, 27 Sep 2007 13:53:58 +0000

بغض النظر عن تلك الأسرة التى وقفت فى إحدى الميادين معلنة عن بيع نفسها,أو ذلك الرجل الذى عرض بيع كليته فى مزاد علنى لكى ينجو بأطفاله من أنياب الفقر

أو حتى تلك المرأة التى باعت رضيعها لأنها بكل بساطة لا تملك ان تطعم نفسها فكيف  تقدر على إطعام صغيرها

بغض النظر عن كل هؤلاء من أصحاب القصص المأساوية

التى تجعلك تبكى _ ولو فى داخلك_رثاء للإنسانية المهدرة فى بلدنا المنكوبة مصر

إستوقفتنى تلم الظاهرة التى إنتشرت فى قرى مصر ةبعض المناطق الفقيرة فى القاهرة

تتلك الظاهرة التى جعلتنى أحقد على الأغنياء  وأسب الفقر معلنا لكل من أعرفه أنه " لو كان الفقر رجلا لضربته بالجزمة ثم قتلته وعرضت بجثته "

تلك الظاهرة التى تبدأ كل عام مع كل موسم سياحى صيفى جديد, حيث يتوافد الأثرياء العرب الى مصرنا ليس للسياحه فقط  كما صدعنا إعلامنا العقيم  ولكن أيضا للمتعة

المتعة من نوع أخر

وتختلف مصادر هذه المتعة فمنهم من يكون مستعجل فيستكفى للذهاب لشارع الهرم وماشبه لقضاء بعض الليالى الحمراء والسوداء

وممارسة الحب مع بنات مصر الذين وجدوا فى الفقر دافع لهم لإحتراف الدعارة هروبا من الموت جوعا وللإنفاق على أسرهم أو لتحقيق أحلامهم المغتاله فى بلدنا المنكوب

فلايجدون مفر إلا من بيع أجسادهن لمن يدفع أكثر تحت ومسمع من شرطة الأداب والسياحة التى تتقاضى مبلغا من المال عافية وبلطجة لتيسير مثل هذه الأمور والحجة " حماية السياحة "

أما الأخرون وهؤلاء قلة فإنهم يخافون الله ولايحبون الحرام , فيقررون الذهاب لأحد القوادين وما أكثرهم

فيأخذهم لأحدى قرى مصر المهروسة أو لاحدى المناطق الفقيرة فى القاهرة لكى يمارس الجنس تحت مسمى الزواج…

نعم هذا هوما يتم

فتحت أغراء المال تضطر الفتاه الفقيرة  التى لا يتعدى عمرها 20 عاما

أن تقبل لبيع نفسها كجارية أو كأى شئ يباع  لذلك العجوز العربي الثرى الذى ربما يبلغ عمره ال 70 عاما

لكى تساعد أهلها فى تربية أخوتها أو لكى تستطيع أن توفر لهم مسكن بدل تلك الحجرة التى يتكدسون فيها فتصبح بيتا من لحم . أو لانها بكل بساطة لن تستطيع الزواج من حبيبها لانه لا يستطيع توفير ابسط الأشياء لها من سكن مناسب " شقة يعنى "

أو … أو …….. أو …………….

المهم أنها تضطر تحت الضغوط بيع جسدها تحت مسمى الزواج

ولم لايمر شهران حتى تبدأ معاناه جديدة لك ى تثبت أن ما يتحرك فى بطنها إبنه

أو لكى تستطيع الحصول على أبسط حقوقها بعد أن يتركها " مطلقة أو معلقة " ويعود لأهله

مقسما لهم بأغلظ الإيمان انه لم يزر شارع الهرم

أو ربما تحلو فى فى عينه فيتركها كالجارية ليعود لها كل عام كالسبية التى تنتظر سيدها أو كاللعبة التى تتركها عل ى أحد الرفوف حتى تشتاق اليها فتعود إليها لكى تلعب

وهكذا

تتحول بنات مصر لبضائع تباع لمن يدفع أكثر وغالبا من يدفع لا يقدر ثمن البضاعه

أما عن مجالس حقوق المرأة والذى يتحفنا الإعلام كل يوم بإجتماعه أو  بقرارته المذهلة التى سوف تحول مجرى تاريخ المرأة

فأعتقد أنه أنشأ لكى تقضى عضواته وقت فراغهن لا أكثر

هذا المجلس الذى لم يستطع حتى الأن أن يحل مشكلة واحدة من مشكلات المرأ المصرية

هو نفسه من وقف متفرجا على أحداث التحرش وأحداث هتك أعراض بنات مصر على مسمع ومرأى من رجال الأمن

هو نفسه الذى وقف صامتا على بيع  بنات مصر كخادمات فى الدول العربية

ولا عــــــــــــــــزاء الا لنا

عندما يسألك العسكر انت بتعمل مع الموزة ايه ياض رد بنثمل يا معلم

مواطن بلا وطن — Thu, 27 Sep 2007 13:25:13 +0000

ماذا يحدث إذا خانك الشيطان وأنت تجلس مع موزة حلوة أو بنت شقية
وتلاعب بعقلك حتى الثمالة وقررت فى لحظة ضعف أن تتبادلا القبلات فى مكان عام وأمام كل الناس ؟؟
بمنتهى البساطة ستجد عدد من الاقلام المحترمة التى تصفعك على وجهك ولن تنجو مؤخرتك من تلك الأقدام التى ستسدد الى جسدك كأنها تضرب كرة قدم فى ملعب ما
وربما ينتهى بك الأمر الى حضور العسكرى الذى سيتهمك بأبشع التهم ويسبك أنت وأبوك الذى ( معرفش يربيك) وربما تهور وطاوعته يده فيلطمك كام قلم مش محترم من النوع الميرى على قفاك
ولن يرضى بأقل من عمل محضر ليك محترم لينتهى أمرك للنيابة وتجد نفسك متهم بتهمة
( فعل فاضح فى الطريق العام )
وربما صعبت عليه وأخذته الشفقة على مستقبلك وعلى مستقبل البنوتة التى معك
فقرر أن يسامحك لكن لازم يامعلم تهرش .
وأعتقد أنه لن يقبل بأقل من مبلغ محترم خصوصا لو كانت البنت حلوة علشان يسامحك ويعدى الموضوع
كأنكم أتنين أجانب(سياح يعنى ) من حقهم يمارسوا حريتهم فى أى مكان علشان ميحسوش بالغربة
وعلشان نثبت لهم أننا بلد مضياف وأننا ننعم بالحريات والديمقراطية .
هذا الذى سوف يحدث مع أى شخص يضبط يمارس الفعل الفاضح فى مكان عام
أى شخص يعنى غلبان من زى حالتنا .

لكن سيتملكك الغيظ والضيق عندما تعلم أن هناك من يمارس مثل هذه الأشياء
وربما يتطور الأمر بهم لفعل فاضح كامل يشاهده كل الناس
ثم يخرجون علينا فنصفق لهم ونهتف بأسمائهم ونتغنى لهم
ونتمنى من داخلنا أن نسلم بس عليهم ولو من بعيد لبعيد
ويخرجون علينا كل عام وهم يحصدون الجوائز والاوسمة بمناسبة ومن غير مناسبة
هؤلاء الذين تمر عليهم شرطة الاداب فتحييهم وتنحنى لهم
هؤلاء الذين إتخذوا من الفن ستاراًً لممارسة شذوذهم عن مجتمع الذى تربينا عليه
انهم ( الفنانين ) ……….
ايه ياعم أنت مجنون انت بتقول ايه يا أسطى ؟؟؟ حاسب حاسب على كلامك
انت كدا بتسئ للفن الرسالة السامية فى بلدنا .
طيب تعالى أقولك و
أهدى كدا وتعالى نتكلم بالعقل وخليك معايا للأخر

عندما نتحدث عن فترة السبعينيات ستعرف أن الافلام
التى أنتجت فى تلك الفترة منعت من العرض تماما فى البلاد العربية
وستعرف مثلى أنها لم تكن أفلام عادية
فهذه الافلام تحتوى على مشاهد جنسية كاملة لممثلين مشهورين اوى
ومافيش داعى ذكر أسماء لأننا فى رمضان والله حليم ستار
مشاهد جعلتنى أنصدم عندنا شهدتها صدفة
ولم أصدق أن هذه هى أفلام عربي
أنتجت للسينما تحمل للمشاهدين رسالة
وكان من المفروض أن يشاهدها الناس
تعجبت كيف يقبل هؤلاء أن يقمن بمثل هذه الافعال
وهل ما يقومون به من تلك الافعال هو الفن الذين خدعونا به ؟؟؟
هل هذه الرسالة التى جعلت بعضهم يطلق على هذا الزمن زمن الفن الجميل؟؟؟؟
دا روبى طلعت أرحم منهم فكل الذى بلغ منها
موصلش الأمر لتلك الصفاقة والانحلال الذى حدث من هؤلاء الموهبين
أنا مش بدافع عنها لأن برضه اللى كانت بتعمله كانت كوسة مش فن
لذلك أصبحت أحتقر كل هؤلاء الذين يخرجون علينا كل عام بمسلسلات
ويزعمون أنهم أصحاب رسالة ومهنة وشرف
وهم أصلا خاربنها من زمان وأفلامهم تشهد عليهم
علشان كدا لو قابلك أى عسكرى وأنت فى وضع حميم
مع الموزة وقرر أنه يعملكم قضية أداب
أصرخ فى وشه
أنت مش عارفنى
أنا فنان وبنثمل الكاميرا الخافية .. !!!
عندها أتأكد إنه هيسيبك.. ويمكن يوصلك ببلاش كمان وستنجو من أقلامه الميرى